Optimus Template

INLEIDING

Dit is logies dat ‘n onderdrukte volk soos die Afrikanervolk sal soek na oplossings vir die dilemma waarin hy hom tans bevind. En sal mense byvoeg: Daardie oplossing moet nou vinnig kom!

Eens was ons trotse volk die regeerder van hierdie pragtige land, maar tans is hy verneder tot derdeklas-burger wat op geen terrein selfgeldend kan optree nie. Hy is uitgelewer aan ‘n kommunistiese regering wat daarop uit is om ons volk, sy verlede, en sy nalatenskap uit te wis.

Daarom is dit logies dat die Afrikaner planne sal beraam om homself te bevry. Dit is egter gebiedend noodsaaklik dat die planne wat gemaak word (en aksies wat geloods word) weldeurdag sal wees, dat dit uitvoerbaar moet wees, en dat dit as einddoel het die volwaardige vryheid (selfbeskikking) van ons volk in ‘n soewereine grondgebied (staat).

Die Afrikaner is reeds herhaalde kere sy outonome selfregering ontneem deur magte wat eiebelang (veral finansiële voordeel) vooropstel. Die Groot Trek was die resultaat van ‘n volk-in-wording wat geweier het om onder Engelse juk tweede viool te speel. Daarna moes ons weer vanweë imperiale magte se versugting na goud onderwerp word aan Britse oorheersing. Die basiese reg van ‘n volk – om in sy eie grondgebied oor homself te regeer – die reg tot vryheid, was die Afrikaner nog nooit gegun nie. Ons volk sal egter nie rus voordat daardie vryheid nie herstel is nie.

Na 1994 is daar net een pad wat vir ons oor is om te loop om hierdie doelwit te bereik, naamlik die pad van weerstand, protes en verset. Maar laat ons hieroor deeglik besin:

Dit is dikwels moeilik om wêreldgebeure te ontleed. Dit is so omdat die wêreldheersers van hierdie eeu juis nie wil hê dat hulle bose planne ontmasker moet word nie. Daarom sal die gewone man op straat kwalik glo dat Kommunisme en die geldmagte kop in een mus is. Dog word ‘n geswore Kommunis soos Gill Marcus president van die mees waardevolle besitting van die geldmagte in Suid-Afrika, naamlik die Reserwebank. Hoe op aarde is dit moontlik?

Die afgelope eeu was gekenmerk deur ‘n alliansie van geld en intellek waarby intellek meestal onderworpe gestel was aan die belange van geld. Die geldmagte van die wêreld was eers in afsonderlike state gekonsentreer, maar het met verloop van tyd verenig. Die intellek het aanvanklik gesetel in die Christelike ortodoksie, maar is met verloop van tyd, weens die invloed van veral die leerstuk van menseregte, vervang deur die ideologie van sosialisme.

In hierdie proses was daar egter faktore wat in die weg van hierdie magte gestaan het en wat verwyder moes word onder die dekmantel van wêreldvrede. So is nasionalisme en die soewereiniteit van state gesien as die groot struikelblok om ‘n eenwêreldregering (Nuwe Wêreldorde) daar te stel. Deur beheer te verkry oor die geldstelsels van state, veral deur middel van die sentrale banke wat hierdie proses beheer het, het die geldmagte al groter beheer oor die politieke besluite van hierdie state gekry en is die soewereiniteit van state al meer in gedrang gebring.