SA IS SIEK, SÊ JACOB ZUMA

Gepubliseer op 29 April 2015 | Geskryf deur Redaksie |

| Trefslae: 2073

Inderdaad, Zuma! Net ‘n bietjie flou uitgedruk as ‘n beskrywing van die werklike toestand. Terminaal gekontamineer sou nader aan die waarheid wees, met min tyd voor finale ineenstorting! As FW de Klerk se siening egter in aanmerking geneem word, dat hoewel daar probleme is, dit tog beter is as voor 1994, is dit waar die AVP Zuma se stelling dat: “Suid-Afrikaners, parlementslede ingesluit, is sielkundig siek”, as die enigste intelligente opmerking van hom erken sedert die Swartes deur de Klerk in 1994 onwettig in politieke beheer gehelp is!

Dit is opvallend dat Afrikaners nie in dié intelligente stelling van Zuma ingesluit word nie en dit kan ook nie omdat daar van meet af aan onderskeid gemaak is tussen hulle en Suid Afrikaners! Zuma se vermoë om politieke gebeure in perspektief te beoordeel, word terselfdertyd weereens sterk beklemtoon deur sy stelling dat selfs na 21 jaar, apartheid steeds die skuld moet dra as ‘n plaaslike swarte ‘n immigrante swart kind van 12 jaar voor ‘n skare jillende swartes wreedaardig vermoor deur hom saam met ander te verbrand! Want geweld sê hy, is apartheid se skuld!

Selfs die ontstaan van Malema se EFF, sê Zuma, is apartheid se skuld. Die AVP plaas die hele berig soos Llewellyn Prince dit geskryf het, omdat sy ontleding dat dit die “woede en gewelddadigheid” is wat aanleiding gee tot die hoë misdaadvlakke en die onlangse xenofobiese geweld in KwaZulu-Natal en Gauteng, nie te onderskei is van die intelligensiepeil wat deur Zuma se stellings openbaar word nie.

. . . en die geweld is apartheid se skuld

Deur Llewellyn Prince Dinsdag 28 April 2015 03:30

Suid-Afrikaners, parlementslede ingesluit, is sielkundig siek en kwaad.

En dís weens apartheid, het pres. Jacob Zuma Maandag gesê.

Hy het duisende mense by die amptelike Vryheidsdagviering by die Uniegebou in Pretoria toegespreek.

Dit was die sterkste nóg wat Zuma uitgevaar het teen die woede en gewelddadigheid wat aanleiding gee tot die hoë misdaadvlakke en die onlangse xenofobiese geweld in KwaZulu-Natal en Gauteng.

Sonder om name te noem het Zuma die uitdagende houding van die EFF as ’n erfstuk van apartheid beskryf.

Hy het hom ook baie sterk uitgespreek teen Afrika-lande wat Suid-Afrika weens die xenofobiese geweld kritiseer.

Zuma het onder luide toejuiging gesê dit is hoog tyd dat die hoofredes vir buitelanders in Suid-Afrika op die hoogste vlak in die Afrika-unie en die Suider-Afrikaanse Ontwikkelingsgemeenskap bespreek word.

Volgens Zuma is die woede en geneigdheid tot geweld in die samelewing ’n direkte resultaat van die ontmensliking van apartheid.

“Apartheid was ’n gewelddadige stelsel wat gewelddadige teenstand geskep het.”

Hy het erken nie genoeg is ná 1994 gedoen om die kultuur van geweld wat apartheid gekweek het, te takel nie.

“Ons moet daarom meer doen om genesing en verdraagsaamheid onder al ons mense te bevorder.

“Dit moet die plig van alle gemeenskapsleiers, en nie net die regering, wees nie.

“Ons benodig ’n sielkundige kuur om van die woede ontslae te raak.”

Volgens Zuma kan die woede selfs in die parlement gesien word.

“Die parlement is een van die mees gerespekteerde instellings. Een van die magtigste kantore daar is dié van die speaker.

“Selfs al is jy verkeerd of die speaker nie reg nie, moet daar orde wees as die speaker vir orde vra. As die speaker sê sit, moet jy sit. As die speaker sê jy moet jou stellings terugtrek, het jy nie ’n alternatief nie. As die speaker jou uitsit, moet jy uitgaan.”

LP’s daag eerder die speaker uit in alles wat sy sê.

“Dit is ’n voorbeeld van die aard van die kultuur van geweld wat apartheid gekweek het.

“Selfs in die parlement moet ons genees word. Ons is siek!”

Zuma het gesê hy hamer op dié kwessie omdat die land ’n probleem het wat dringend opgekos moet word. “Want ’n lewe word hier vir niks geneem.”

Volgens Zuma moet die deurlopende uitdaging van rassisme ook aandag kry.

“Dit verg meer entoesiastiese nasiebou- en genesingspogings van elke sektor van die samelewing.”

Hy het ook gekap na Afrika-lande wat Suid-Afrika kritiseer weens die xenofobiese geweld.

“Buitelanders met wie ons onlangs hier gepraat het, meen Suid-Afrika is ’n veilige land met ’n grondwet wat alle mense beskerm.

“Hulle het selfs gewaarsku nog ’n golf van vlugtelinge kan in Suid-Afrika verwag word gegewe verwikkelinge in hul tuislande.”

Volgens Zuma moet Afrika-lande, in plaas van kritiseer, eers hulself bekyk om te sien waarom hul burgers hulle in Suid-Afrika bevind.

‘Sithole’ glo onwettige immigrant

Die Mosambieker wat ten aanskoue van ’n span joernaliste in Alexandra doodgesteek is, het onwettig onder ’n vals naam in Suid-Afrika gewoon.

Pres. Jacob Zuma het Maandag in Pretoria gesê ondersoeke toon Manuel Jossias, wat in die media Emmanuel Sithole genoem is, was ’n onwettige immigrant.

Zuma het ook die drie Suid-Afrikaners geïdentifiseer wat in die xenofobiese aanvalle dood is: Ayanda Dlamini (22), Thabo Mzobe (14) en Msawenkosi Dlamini (29).

“Ons innigste meegevoel aan al die families, sowel as landgenote van die oorledenes.”

Zuma het gesê die polisie werk onverpoos om al die moordenaars vas te trek. Hy het gemeenskappe aangeraai om misdadigers in hul midde te isoleer en aan te meld.

Die publiek is ook bedank vir inligting en die optogte teen xenofobie verlede week.

Volgens Zuma wys dit die meeste Suid-Afrikaners is vredeliewend en gekant teen xenofobie, rassisme en verwante onverdraagsaamheid.

– Llewellyn Prince

Planne teen xenofobie

Die regering sal:

■ Die onderliggende redes vir die geweld en spanning takel wat toegeskryf word aan armoede, werkloosheid, ongelykheid en die wedywering om beperkte bronne;

■ Die ekonomie gebruik om werk vir die jeug te skep wie se frustrasie in townships en landelike gebiede oorkook en hulle dan tot misdaad, drank en dwelms wend;

■Met alle rolspelers, veral die privaatsektor, saamwerk om te verseker dat hulle buitelanders nie meer teen goedkoper salarisse aanstel nie;

■ Met gemeenskappe saamwerk vir hulp met buitelanders;

■Sekuriteit op grense verbeter deur die weermag wat in sewe provinsies grensposte sal patrolleer “omdat ons nie kan verwag dat engele of ons voorvaders dit moet doen nie”;

■Weermaglede ontplooi as bykomende immigrasiebeamptes by grensposte; en

■ Vroeg in 2016 nuwe wetgewing oor immigrasie bekend maak. Die departement van binnelandse sake is tans besig daarmee.

Kategorie: Artikels

Media

SA IS SIEK, SÊ JACOB ZUMA